( الرجوله مش بالذكوره )
#elsha3erRr
ضِحكِت بنيّه صافيه و قالت :
{{ و الله بعد ماخلصت رقص ، خرجت بره و وصّلني بعربيته }}
... كانت ماسكه موبايلها و حاطاه على ودنها ...
و بتِعدِل طرحتها .. فطِلِعلَها واحد قاعد في الcofe جنبها ...
و قال لها : {{ هه !! ماتيجي أوَصّلِك انا كمان }} !!!
فاتعصبت و قالت : {{ إقفلي دلوقتي ياحنان }} ...
... و عينيها استحقرته بكلام .. ماقالتهوش باللسان و رَمِت الموبايل جنبها و قالتله :
{{ على فكره انت مش محترم و ماتعلمتش ازاي تبقى راجل }}
فضِحك لها و قال لها باستهزاء : يا راااجل ؟!
ف خَدِت شنطتها علشان تقعد على ترابيزه تانيه ...
ف قال لها : استني ثانيه !
{{ خدي موبايلك و ياريت ماتمثليش دور المحترمه .. ياستي اعتبريني حنان ! و كَمّلي معايا المكالمه ! }}
... وشها جاب 100 لووون .. و قالتله : انت مجنون ؟!
و خطفت موبايلها من ايده .. و مع اول خطوه لسيرها للترابيزه التانيه ...
قال لها باستهزاء و ضِحكه سَمِجه : هأ !! ده انتي رقاصه !
ف ردت عليه بصوت مكسور و قالت له :
{{ ربنا يسامحك و يجيبلي حقي منك }} .
ثم سارت متجهه الى الترابيزه ...
ثم تساقطت امطار دموع العزيزه .. ثم جَلَسَت ...
و اديتله ضهرها و فِضلِت تفكر في المشهد .
و بمجرد ماقعدت ع الكرسي في سينما ذاكرتها ...
زادت دموعها و استحقارها لبطل مشهدها ( الذكوري اللا رجولي ) .
ثم اخذَت في التساؤل و سَرَحَت في الالام ...
و إفتكرت حبيبها اللي خانها مع صاحبتها في نفس المكان ...
اقصد بكلمة نفس المكان ( الترابيزه اللي قعدت عليها ) .
اصلها كانت قاعده ع الترابيزه الاولى علشان تفتكر دموع عيونها ...
يوم اكتشاف الخيانه .. ف تِقَسّي نَفسَها من تاني و تقلل حنينها .
... نرجع تاني لموضوعنا الاساسي ...
... ومش ناسي ...
اللي كانوا قاعدين ع الكراسي و مستعميين عيونهم عن الضحيه ...
... ما هيّ هيّ ؟!
لو سمعوا .. زي ماسمعوش !! و كلٌ مَلهِي في لَيلَاه ...
... اه !
اصل الاغاني صوتها كان عالي ...
معلش بقى يابنتي !! نصيبك .. ان اللي شغالين في الcofe ...
يطلعوا ماشيين بمبدا ( و انا مالي ؟! )
... للاسف !! و مع اعتذاري ...
لكل بنت تَأذَّت من سَطو الفِكر الذكوري ...
و مع امتناني ...
لكل رجل سَانَدَ اي انثى بكل فعل رجولي .
#elsha3erRr
... و بعد ساعه تقريبا ...
قام الجاني من مكان ارتكاب الجريمه ...
ثم سارَ متجها الى الباب .. بعد دفع ثمن جلسته المشؤومه ...
بس اتفاجىء لما وصل عند ترابيزة المجني عليها .
اصله لقاها راسمه بمناديل دموعها على ترابيزتها .. نص قلب ...
و لاقاها راسمه .. على ورقه رسمه .. فيها بنت و راجل قاتلها ...
كاتبه على صدره ( ممثل ) .. و على شفايفه ( كدبه ) ...
و على سِكِينتُه ( شهوه ) .. و على فستان البنت ( الضحيه ) ...
و عيونها .. في الاولى( نظرة حب ) .. و التانيه .. ( خوف و صدمه ) .
... إستغرب !!!
و فاق ماتَبَقّى من رجولته ,, و قال لها منحنيا : " اسف " ...
ف بَصّت له نفس البصّه اللي في عيون البنت اللي في الرسمه و قالت له : " عارف ؟! "
انت ملكش اني اقولك مبررات ولا حتى اسباب .. بس انا هاقول لك ...
و ربنا يعينك على تانيب ضميرك .
انا اول لما دخلت الcofe و كنت بتكلم في الموبايل .. كنت بكلم صاحبتي ...
لما انت عاكستني .. او بمعنى اصح دَبَحتِني .
... و حبست دموعها تنهيدتها و قالت له : المهم !!!
انا كنت بقول لها :
{{ و الله بعد ماخلصت رقص ، خرجت بره و وصّلني بعربيته }}
جه يقاطع كلامها .. قالتله بعصبيه : استنى لو سمحت !! انا كنت ...
انا كنت في بيت صاحبتي علشان فرحها بعد بكرا ...
و بابا هو اللي وداني و هو كمان اللي وصلني لحد هنا بالعربيه .. و انت كلامك دَبَحني .
... فاهمني ؟!
و فضلت تعيط .. و الله يعينها ع اللي جواها ...
ف فِضِل يتاسف لها .. و عينه .. البنت كاسراها .
ف سابته و قامت و خَدِت رَسمِتها .. و لَمّت مناديلها مع دموعها بكل كرامه ...
مُعلِنَه انتصارها بابتسامه .. و قالت له : على فكره ...
( الرجوله مش بالذكوره ) .
#elsha3erRr
تعليقات
إرسال تعليق